Notice: Undefined variable: db in /home/nart/public_html/arsiv.nartajans.net/function.php on line 6

Warning: mysqli_query() expects parameter 1 to be mysqli, null given in /home/nart/public_html/arsiv.nartajans.net/function.php on line 6


Адыгабзэмрэ тхыбзэмрэ я Мафэ фэгъэхьыгъагъ



МэфэкI зэхахь



Адыгабзэмрэ тхыбзэмрэ я Мафэ ехъулIэу тиреспубликэ щыкIогъэ Iофтхьабзэхэм агупчэ хъугъэ бэрэскэжъые мафэм Мыекъуапэ, драматическэ театрэм щыкIогъэ мэфэкIыр. Ащ хэлэжьагъэх адыгабзэм ианахь кIэлэегъэджэ дэгъухэр, адыгабзэм фэщэгъэ кIэлэеджакIохэр, район администрациехэм гъэсэныгъэмкIэ ягъэIорышIапIэхэм яIофышIэхэр ыкIи нэмыкIхэр.

МэфэкIыр рамыгъажьэзэ, ыпэрэ мафэм Адыгэ Республикэм и Президент дэжь адыгабзэмкIэ щыIэ Советым ыгъэнэфэгъэ купэу шIэныгъэлэжьхэр, кIэлэегъаджэхэр, министерствэм иIофышIэхэр зыхэтыр Бэрсэй Умар исаугъэтэу Адыгэ къэралыгъо университетым илъэпкъ факультет ищагу дэтым къэгъагъэхэр кIэрилъхьагъэх.

МэфэкIыр къызэIуихыгъ гъэсэныгъэмрэ наукэмрэкIэ министрэу Жэдэ Андзаур. Адыгэ Республикэм и Президентэу Шъэумэн Хьазрэт ыцIэкIэ ащ къызэIукIагъэхэм шIуфэс сэлам къарихыгъ. А мафэм ятфэнэрэу адыгабзэм и Мафэ зэрэхагъэунэфыкIырэр, мы аужырэ илъэс заулэм ащ нахь мэхьанэ раты зэрэхъугъэр министрэм къыIуагъ.

Бзэм фэгъэхьыгъэ законыр заштэм, адыгэ пэпчъ ежь ишIоигъоныгъэкIэ адыгабзэр зэригъэшIэнэу ащ итхэгъагъ. Ау Президентыр кIэщакIо фэхъуи, а статьям зэхъокIыныгъэ фашIыгъ. Парламентым ыштэгъэ законым теткIэ джы адыгэ пэпчъ адыгабзэ зэригъэшIэн фаеу щыт.

Министрэм игуапэу къыIуагъ нэмыкI лъэпкъхэм ялIыкIохэу тиреспубликэ щыпсэухэрэм адыгабзэр зэрэзэрагъашIэрэр. АщкIэ щысэу къыхьыгъэхэм ащыщ адыгабзэмкIэ кандидатскэ диссертацие зытхыгъэ Марина Волковар.

Адыгэ Республикэм инароднэ артисткэу Уджыхъу Марыет ны-тыхэм ацIэкIэ мэфэкIым къыщыгущыIагъ. Сабыим иныдэлъфыбзэ Iулъыныр зэпхыгъэр ян ары. Ащ къыпкъырыкIэу, Марыет ипсалъэ ыгъэпсыгъ. Актрисэм ежь шъэожъыитIу иI, ахэр щысэтехыпIэу адыгабзэкIэ мэгущыIэх. Ежь Марыет еджапIэхэм рагъэблагъэу бэрэ къыхэкIы. Актрисэм зэрэфэлъэкIэу адыгабзэм хэхъоныгъэ ышIыным иIахь хелъхьэ. Сценэм къыщишIырэ рольхэм, радиомкIэ ыкIи телевидениемкIэ зэхищэрэ къэтынхэм анэмыкIэу еджапIэхэм адыгабзэм имэхьанэ закъыщиIэтынымкIи ишIуагъэ къегъакIо.

Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу МэщбэшIэ Исхьакъ бзэм хэхъоныгъэ езыгъэшIыхэрэм ащыщ. Ащ гущыIэр зыратым, непэрэ мафэр анахь мэфэ дэгъоу къыгъэшIагъэхэм ахилъытагъ. ЕгъашIэм адыгэ лъэпкъыр зыкIэхъопсыгъэр къыдэхъугъэу ылъытагъ. Мыщ фэдэ Iофтхьабзэхэр, бзэм мэхьанэу непэ ратырэр мы чIыпIэм ухыгъэ щымыхъухэу лъыкIуатэхэмэ зэрэшIоигъор къыIуагъ.

Ащ къыкIэлъыкIоу мэфэкIым къыщыгущыIагъэх гуманитар ушэтынхэм апылъ республикэ институтым идиректорэу КIыргъ Асхьад, Адыгэ къэралыгъо университетым идеканэу Бырсыр Батырбый, ыпшъэкIэ зыцIэ къыщетIогъэ Марина Волковар, Адыгэ кIэлэегъэджэ колледжым икIэлэегъаджэу Андзэрэкъо Светланэ, Адыгэ Хасэм иисполком хэтэу МэщфэшIу Нэдждэт, Косовэ къикIыжьыгъэ адыгэхэм ащыщэу, республикэ гимназием щеджэу Цэй Мейса, тхакIохэм я Союз щыщэу ГъукIэлI Нурбый, Адыгэ Республикэм ыкIи Краснодар краим ащыпсэурэ быслъымэнхэм ямуфтиеу Емыж Нурбый, Адыгэ Республикэм исуд итхьаматэ игуадзэу Хьакъуй Аскэр, гъэзетэу «Адыгэ макъэм» иредактор шъхьаIэу ПIатIыкъо Аслъан ыкIи нэмыкIхэр.

Зэхахьэу цIыфыбэ зыхэлэжьагъэр мэфэкI шъыпкъэ къашIыгъ Адыгэ республикэ гимназием икIэлэеджакIохэу, орэдыIо Iазэхэу ЛъэпцIэрышэ Щамил, Мыгудж Саидэ, ЛIыунэе Алый, Бэрэтэрэ Мурат, кIэлэцIыкIу IыгъыпIэу N 28-м чIэс кIэлэцIыкIухэу къэшъуагъэхэм ыкIи орэд къэзыIуагъэхэм.

Адыгабзэм иIоф зы мэфэкIыкIэ тымыухэу, мафэ къэс адыгабзэм иурокхэм мэфэкIым фэдэу фэкIэщыгъохэу кIэлэеджакIохэр якIухэу, ныдэлъфыбзэм имэхьанэ къэзыIэтыщт кIэлэегъаджэхэри, еджапIэхэм япащэхэри нахьыбэ хъунхэу мэфэкIым гугъапIэ къытитыгъ.



СИХЪУ Гощнагъу

Сурэтхэр мэфэкIым къыщытырахыгъэх.




Copyright 2006 © "Адыгэ макъ"

adygvoice@mail.ru

Etiketler:
adıgey adıge dil bayramı kutlandı