Урыс-Кавказ зауэр зэриухрэ илъэси 140-рэ зэрырикъум и щIыхькIэ ирагъэкIуэкIыну Iуэхугъуэхэм я къызэгъэпэщакIуэ гупыр дыгъуасэ Налшык Правительствэм и Унэм щызэхуэсащ. Ар иригъэкIуэкIащ КъБР-м и Правительствэм и УнафэщIым и къуэдзэ Сэхъурокъуэ Хьэутий.ЗЭIУЩIЭМ щытепсэлъыхьащ Iуэхугъуэ яубзыхуахэр зэрагъэзащIэм. Псалъэм папщIэ, а Iуэхугъуэхэм хэтщ Урыс-Кавказ зауэр зэриухрэ илъэси 140-рэ зэрырикъум и щIыхькIэ еджапIэхэм, щэнхабзэмкIэ унэхэм зэIущIэ, зэхуэс зэмылIэужьыгъуэхэр щрагъэкIуэкIыну, сурэт гъэлъэгъуэныгъэхэр къызэрагъэпэщыну, нэгъуэщIхэри. Иджыпсту щIэгъэхуэбжьауэ йолэжь Урыс-Кавказ зауэм хэкIуэдахэм я фэеплъ сыныр накъыгъэм и 21-м къызэIухыным. ЗэIущIэм хэтахэм жаIащ а Iуэхур арэзы укъищIу зэрекIуэкIыр икIи сыныр жыхуаIа пIалъэм ирихьэлIэу къызэрызэIуахыфынур.ЗэIущIэм къыщыпсэлъахэщ Къэбэрдей Адыгэ Хасэм и тхьэмадэ ХьэфIыцIэ Мухьэмэд, Дунейпсо Адыгэ Хасэм и тхьэмадэм и къуэдзэ IутIыж Борис, КъБР-м щэнхабзэмкIэ и министр Балъкъыз Михаил, егъэджэныгъэмкIэ министр Щоджэн Ахьмэд, печатымрэ информацэмкIэ министр Мороз Любовь, КъБР-м и Президентым и чэнджэщэгъу Тхьэгъэзит Юрэ, КъБКъУ-м и проректор Шыбзыхъуэ Азэмэт, Гуманитар къэхутэныгъэхэмкIэ институтым и унафэщI Думэн Хьэсэн, Налшык къалэ администрацэм и Iэтащхьэм и къуэдзэ Портэ Галинэ, Къэбэрдей-Балъкъэрым ис муслъымэнхэм я унафэщI ПщыхьэщIэ Iэнас.КъызэгъэпэщакIуэ гупым и зи чэзу зэIущIэр мэлыжьыхьым и 27-м зэхэтынущ.АБЗУАН Пщымахуэ.(Adığepsale gazetesinden) Besniyecale